Пістің хазнада Чоннар аразындағы ипчілер кӱні алғым таныхталча. Аны прайзы даа сағыпча: улуғлар паза кічіглер, иреннер паза ипчілер, оолахтар паза хызыҷахтар. Піреезі сыйыхтар тимнепче, піреезі, тізең, сыйыхтар паза алғыстас сӧстерін сағыпча. Пу ӱлӱкӱн наа ла тӧстелгенде, сыйыхтар сыйлир кибір чох полған. 1965 чылдаң на сығара ипчілерге 8 Мартха тюльпаннар сыйлап сыхханнар. Пӱӱнгі кӱнге сыйыхтарның санында ниме ле чоғыл. Иреннер пу ӱлӱкӱнге хайдағ сыйыхтар читірчеткенін піліп алар ӱчӱн, сурастырығ иртірібіскем.
Владимир БАЛГАЗИН, Ағбандағы табырах имнег полызии станциязының фельдшері:
— 8 Мартха порчолар паза сувенирлер сыйлапчам.Пу ӱлӱкӱнге хайди даа чахайахтар сыйлирға кирек тіп санапчам. Ноға? Олар часхы пасталчатханын таныхтапчалар. Туған-чағыннарыма иб аразында тудынҷаң ниме-ноолар сыйлапчам. Кӧзідімге, ідіс- хамыс.
Ипчілерні 8 Мартнаң алғыстапчам! Хазых, часка алғапчам! Хакас чоныбыстың саны хозылар ӱчӱн, прайзының хайди даа палалар ползын, ипчілер кӧп пала тапсыннар!
Сергей САРЛИН, Н.Ф.Катановтың адынаң Хакас национальнай гимназияның 11-ҷі класстың ӱгренҷізі:
— 8 Мартха чахайахтар паза книга сыйлапчам. Книга — чахсы, тузалығ сыйых. Н.Ф.Катановтың адынаң гимназияның ӱгретчілерін Чоннар аразындағы ипчілер кӱнінең алғыстапчам! Сағынған сағыстарың толзын, прай киректерің киліссін! Хазых паза часкалығ полыңар!
Анатолий ПАКАЧАКОВ, пенсионер:
— Ипчіме 8 Мартха порчолар сыйлапчам. Пӱӱл чахайахтарох сыйлим. Пу иң килістіре сыйых полча тіп санапчам. Ипчімнең хада Таиландсар тынанарға пар килерҷікпін, че тус килістіре нимес. Пу туста анда наңмырлар чаапча. Ипчілерні часхы ӱлӱкӱнінең алғыстапчам! Хаҷан даа ачых-чарых, сіліг, хазых полыңар! Прай киректерің киліссін!
Олег ШУЛБАЕВ, писатель:
— Ипчіме паза ікі хызыма 8 Мартха чахайахтар сыйлапчам. Пӱӱл ӱлӱкӱнге чапсых ас-тамах тимнеп пирерге сағынчам. Ипчім паза хыстарым иптіглер, чахсы хылыхтығлар, арығ сағыстығлар. Оларға хаҷан даа андағ поларға алғапчам! Ипчілерні 8 Мартнаң алғыстапчам! Піске, иреннерге, хынзыннар паза алҷаастарыбысха тың хайбазыннар! Алҷаас чох кізі чуртабинча.
Олег БЫТОТОВ, оператор:
— Чыл сай 8 Мартта ипчіме паза іҷеме порчолар сыйлапчам, пірееде ибде тудынарға киректелчеткен ниме-ноолар: чейник, утюг паза даа пасха нимелер. Амғы туста кӧп кізінің ахчанаң сидіксіністер, аннаңар ӧӧні — кізіні хайығ чох артыспин, кічіг дее сыйых читір пирері. Ипчілер хаҷан даа хазых, ачых-чарых ползыннар! Пістеңер ундутпазыннар паза піске хайығ айландырзыннар.